Tèrla, mi sort diskit in pé èk bann zanplwayé komino mon kominn, banna té pou mont in mir mwalon. Toudinkou nou la tonm si lo sizé zéléksyon départmantal, an so moman, koman évit lo sizé vik nou lé an plin dodan ziska dimansh, boudikont ziska domin. Banna té sink pou kozé. Inn i di a mwin, kossa ou pans si in zanplwayè komino i sar pa voté dimansh ? Li na lo drwa ousinonsa li na pwin lo drwa rèt son kaz ? Ou krwa si li sar pa, lo mèr i pé konvok a li lindi gran matin, domann a li pou rézon poukoué li la pa voté ? In pé i koz, in pé i koz pa, in pé i akout.

Poukoué tousala késtyon si lo vot vik i prétan domoun i dwa èt lib zordi ? Banna i di a mwin, lo mèr i fé shantaz èk domoun, la di konm sa, pou gingn in lavansman karyèr, domin i fo vni, é la li rogard pa solman si lo boug lé la, li rogard osi si tout son famyi la prézant biro dvot, é konm la néna in dézyinm tour, lé pli danzéré ankor pou nou, vik la, li sar plish la lis éléktoral pou byin war. Ala koman bann zanplwayè komino i fé wuit nèf a shak éstan. Parl pi santaz si la sitiasyon titilèr, a shak éléksyon i roport pou lo proshin zéléksyon.

Konm sa minm i ral a nou tankipé. Mi di par mwin minm, sanm pou mwin, tank zot na pwin in bon léstati pou zot, in vré léstati ki protèz pou vréman bann zanplwayé komino pou tout koléktivité kiswa la rézyon kiswa lo départman osi, sanm pou mwin bann mèr va kontinié profité. Dopi lo tan lo parti kominis i sobat la d’si, dopi lo tan ni di i fo in plan titilarisasyon pou tout. Kont pa si bann mèr la drwat pou fé sa, zot i pé pa koup la brahsh zot lé asiz dosi !