Pa pli loin ké samdi matin moin la lir dann nout zournal Témoignages in késtyon intérésan. Nout zournal té i poz lo késtyon : Kisa i sava koz pou La Rényon ? Kisa i sava koz pou nou ? Kisa i sava défann nout z’intéré ?

Zot i koné nou lé dann la COI (komisyon loséan indien) mé si lé z’ot péi, inn apré l’ot i pé pran la prézidans, nou, pou nout par, ni pran zamé la prézidans. Nou n’oré pi dir : La frans, dann son grann bonté, va domann i manyèr d’ko-prézidans avèk La Frans par èl mèm épi La Rényon par la pèrsone lo prézidan La Réjyon a kondisyon ké kréol i mète do boi avèk li… Sa n’oré bote amoin, mé sé pa lo ka. Mèm lo l’anbasadèr avèk la COI sé pa in rényoné, i sort dann sépa kèl gafourn La Frans, i koné pa l’oséan indien inn tiork, i koné pa nout z’intéré é final de kont ni koné mèm pa kosa li la fé konmsi lo z’afèr i rogard pa nou .

Fi t’in tan, Paul Vergès té i koz asé for pou fé antann nout voi, mé zordi lé fini : nou lé konm martin ki kouzi ; lé konmsi nou sé l’om malad dann l’oséan indien é sétaki l’apré pans arienk tir son tar dsi nou : pa dsi La Frans, mé dsi nou La Rényon. Moin pèrsonèl sa i bote pa moin ditou ! Mi konpran pa nout bann kouzin dann l’oséan indien, mi konpran pa non pli gouvèrnman La Frans. Nou la bézoin in stati k’i done anou lo droi pou défann nout z’intéré. Nou na la lang é ni gingn kozé ; ni koné kosa i fo anou é ni pé dir sa avèk nout prop boush.

Asé so manyèr koz de nou, mé pa avèk nou : konm i di, afors alé a l’o, kalbas i kass !