Somènn dèrnyèr, moin la antann Prézidan Vergès parl déssi bann konpétans la Réjyon, déssi bann gran problèm nana pou réglé dann lé katran k’i vyin. Mi pans demoun té la, sirman zot la konprann la Réjyon i zoué in gran rol pou La Rényon. Zot la konprann galman, mi pans, in paréssé la poin son plas dann konsèy réjyonal si li vé vréman zoué lo rol lo pèp la domann ali zoué.
L’èr-la, kan mi antann, dann radyo wayi-waya, bann zélu lé péyé pou pa fé aryin, épi toush z’ot l’indamnité, mi mazine zot i défoul, in poin sé tou, pars zot la bézoin défoulé vi k’ la manyèr la vi i déroul i konvyin pa zot. Alors zot i mète toute dann mèm panyé, sak i fé zot boulo a-popré konm k’i fo avèk sak lé parèss konm lo shien é zot lé pa konsyansié.
Tansyon, nana bann moun parèss ossi i fé mète azot dann tèl konsèy l’administrasyon, tèl l’organism, é i fé aryink bashé. I prétan dir Didier Robert, sé in éspésyalis l’absantéism kisoi dann lopital Sin-pyèr, kisoi dann l’aéropor le Sud...
Mé toulmoun lé pa parèy. I mélanz pa grinn bébé avèk grin mayi dann mèm panyé ! Otroman, konm in pé i di i : i mélanz pa torshon èk sèrvyèt !

Justin