Mi sort lir la-ba dan la Frans nana dé-troi doiyin bann ziz la désid rouv in lankèt déssi in bann prézidan déssèrtin péi Lafrik, pars d’apré sak i prétan, banna noré détourn larzan piblik dann z’ot péi.
Pétèt lé vré, pétèt lé pa vré. Konm di lo kont : « Qui vivra verra, si i gingn la grip véra ! »

Mé solman, mi sort lir galman dann in péi Lafrik, le Nizèr, na in prézidan, Mamadou Tanje — sa son nom — i sort sign in gran kontra avèk in lantrepriz la Frans, i apèl Areva, pou alé tir liraniome dan la tèr.
Liraniome-la, sa i ansèrv pou fé léstrésité, i pé ansèrv pou d’ot zafèr ankor.. an parmi, bann bonm nikléèr. Hmmm ! lé ziska danzérab...

An pliské sa, d’apré sak i di, dann zistoir-la, i prétan Aréva i fé in bonn afèr, konm dan lo bon tan, lo tan néo-kolonyalis, vik lo péi i gingn pa tanksa. Azout èk sa, in pé i di, lo lakor banna la signé lé pa si tèlman bon pou lo péi, lé pa si tèlman klèr non pli !

Alor, pétèt in zour, in ziz La Frans va déside rouv in lankète déssi prézidan Nizèr. Pétète ? Mé éspéron li v’alé galman rod in pé lo pou dan la tèt inn-dé bon Zéropéin, sak la byin profite lésploitasyon néo-kolonyalis...
Fé, fé pa ? Nou va oir, mé sak lé sir, sé k’i fo pa mète lo shat pou vèy sosis ! Sa la pa in n’afèr pou fé !

Justin