Moin la konète lo tan la frode éléktoral : kan inn-dé nèrvis téi bour lirn, lo prézidan téi lir in nom té pa marké déssi biltin, téi fé vote bann mor, téi falsifié prosé vèrbal, CRS téi matrak demoun, téi bombard kou d’grénad. Moin la konète lo tan oussa bann nèrvis téi tié dmoun, ziska dann périod zéléksion.

Mi ansouvien kan bann moun onète la fé in lassosiasion pou arète avèk so frode brital. Ti-lamp, ti-lamp, la niabou amélior in pé. Tout parti téi gingn zéléksion, shakènn son tour. Si ou la fé in bon kanpagn épi lo moun i vote pou ou an mazorité, ou na moiyin gingn lo zéléksion. Lo tan yèr té fini, in nouvo lèr téi ariv, sof zafèr larzan, pèrsone la pa niabou mète sa an ord.

Lo tan la frode té fini épi bann moun onète lé soulazé. Solon zot, lo tan la frod i arviendra pi. Tan mié ! Ala solman, mi lir dann zournal, la rèye demoun déssi bann list éléktoral Sin-lui, alé oir lo bann moun nana z’ot droi pou voté. Alor, mi di dann mon kèr, lontan téi komans konmsa, apré téi frode pou vréman. Alor mi mazine si lo tan lontan i arvien ? Talèr lé riskab mète zèf poul a kouvé pou gingn ti-kanar !

Justin