Matant Zélida la ékrir Justin :

Mon shèr nové, mon spèss salté, rouj-do-fon dopi dann tan létèrnité, in l’ané i fini épi in n’ot i komans é mi koné pa pou koué dopi lontan mi pans avèk l’ané i vienn fini, lo rouj-de-fon lété bon pou arète avèk sa - dizon pou rotourn dann lo néan li té bon pou ète dopi lontan. La pa pars li la pa fé arien ziska zordi, mé pars sak li la fé lé déyèr li é lé pa dovan li : dann pasé oui, mé pa d’prézan é sirman pa dann fitir. Moin pèrsonèl mi pans lé konmsa. Si té arienk de moin, lo parti rouj-de-fon narté fini dopi lontan pou rode in l’androi ségré pou li ropozé é débaras in pé l’aktyalité. Tok ! Pran sa pou toué !

Justin la fé pou répons :

Mon vyé matant i koz arienk la boush rouvèr, mi koné kosa ou i pans dopi lontan mé la pa ou néna rézon-pou moin, mon parti la pliské rézan par raport bann poinn vizé la… Matant ou i poz konm vérité promyèr nout parti rouj-de-fon lé fini. Ou i pé pansé, ou i pé souété, mé ankor i fo démontré é ou i démontr pa.

Alor di amoin si lo zidé nout parti lé dépasé, si lé an voi d’disparisyon, si étan sak zot i lé zot i ansèrv ar pi zamé arien pou l’imanité… Alon pran in sèl zidé : l’idé la solidarité internasyonal. Ni pé dir dsi lo poinn vizé d’lo zéléksyon - si ni rogard arienk lintéré nout parti - la pa in zidé intérésé. Si ou i pran zidé-la konm in gran prinsip an parmi nout bann prinsip mi pans, li lé pa dépasé, li pé ansèrv pou dévlop la solidarité rant bann pèp, é par la mèm sèrv do baz pou l’antant rant bann pèp é l’antant rant bann pèp sa sé in n’afèr i kont bonpé é va kont ankor bonpé dann nout domin.

Donk ala in lidé lé pa dépasé, é va ankor ansèrv lontan pou l’imanité. Donk ala in l’idé bien dann l’aktyalité, é in parti konm la not k’i défann so lidé – la, i pé pa dir li lé bon pou disparète. Ou i vé, ou i vé pa, lé konm sa é pa otroman. Tok ! Pran sa po ou !

NB - Si ni proné bann zidé nout parti dopi lo tan li lé éné, moin lé sir nout parti lé pa ditou dépasé é myé k’sa li lé modèrn vèye pa. Mi rèv in zour in l’idé, éin zour in l’idé apliké.