Oté

« I nouri pa lo vèr pou pik son kèr ! »

In kozman pou la rout

Justin / 16 novanm 2017

JPEG - 43.6 ko

Sa in kalité kozman mi aprésyé pa ditou. Pou kosa ? Pars si ou i di in n’afèr konmsa, sa i vé dir ou i pans demoun lé ingra é konm k’i diré san rokonésans. Pou sak i koné bann shanson Michel Admette, zot i doi rapèl azot kozman la lé dann in séga « lo prins lo séga » la konpozé. Donk moin la di mi èm pa bann kozman konmsa : pars i prète demoun mové santiman. Lé vré si ou i koz avèk l’istoir ou va aprann Brutus la tyé César é lo promyé lété lo zanfan adoptif lo dézyèm. Si ou i rod in bonpé ou i pé trouv i bonpé ka l’ingratitid, mé ou i pé galman trouv in bonpé l’égzanp la rokonésans. Dé foi ni antan dir la famiy i méfyé inn an parmi so bann zanfan pars i pé touzour ariv dé shoz ou la pa majiné. Alé ! mi lèss azot fé travaye z’ot tèt la dsi é ni artrouv pli d’van sipétadyé.