Bann léktèr nout zoinal, sirman lépizod Mistral la du intérèss azot : oir bann sèrvis l’éta dopi an-o lo Prézidan ziska l’éta lokal La Rényon épi Mayotte, patoj dan la mélass konmsa, moin lé sir zot la gingn lanvi rir. Sof ké lé pa a rir ditou !

Dabor kosa i lo bato Mistral * ? In bato d’guèr fantézi pou donn kou d’min dann in bonpé sityasion : I pé transport bann malad pou sort in l’androi lopital lé sirbouké pou alé dann in l’androi li lé moins, épizapré pou fé la liézon par élikoptèr rant la mèr épi la tèr. Mé antansyon : lo zimo lo Mistral, lo Tonnerre la gingn transport 14 malad dopi Ajaccio ziska Marseille mé i fo bien kalkilé Mayotte-Rényon sa i fé 2000 km é sa i fé pa an in instan. Anplis sort Mayotte pou vni La Rényon alé oir is ni koné pa sak i sava spassé d’isi la finn moi d’avril.

Pou transèr bann malad La Rényon épi Mayotte, sansa pou vol o sokour bann fransé d’frans roténi dann péi étranz. Néna lé dé son i sirkil é lo Prézidan la bo dir sak li vé, a la baz néna in pé i sousyé pa ditou d’ékout ali. !!! Bann Mayotte i anons in lékatonm programé ? Pars lopital néna poin an konsékans. An touléka bravo La frans kolonyal : l’ané 1975 la sépar Mayotte par rapor lo larshipèl Lé Komor. 1975 néna 45 ané é ariv in grav kriz é oila ké lo péi lé pa paré. Bravo La frans kolonyal !

Pou nou madame l’ars i anons anou 240 li pou la réanimasyon : promèss sé dète mé pa pou toulmoun é lo pasé résan l’amontr anou bann promèss i vo sak li vo sirtou kan in pé sé gran prométèr pti donèr. Dann lo léshèl konfyans dopi inn ziska dis, mi sava pa pli loin ké dé.
Nou lé pi dann tan la marine a voil koméla. Koméla i fé bann similasyon. Kèl similasyon la fine fé ? Zéro kalbass la fimé gran-boi. Alor konm i di nou l’apré pa zoué la roulète russ nou la ?

NB-In pé la di néna in l’opital soisna-nèf li. Moin la vi pou lo coronavirus i pé mète 14 pèrsone malad. Katorz avèk 69 néna konm in lérèr la !