Oté

I pé fé ri, si ni vé. Mé i zoué pa avèk nout vi la !

Justin / 23 mars 2020

JPEG - 43.6 ko

Zordi mi vé anparl azot in konférans do prèss moin la vi samdi dann télé : in konférans prévi pou katrèr l’aprémidi, la romète a sinkèr, épizapré la pouss ankor in pti pé pli loin. Mi pans l’avé sis moun ladan, kosté kosté pars paré til l’avé poin la plass pou éspass azot, plis in mète konm téi di k’i fo.

Antansyon la pa d’moun mizèr té apré kozé mé d’moun lo shèk fin di moi lé gro é mèm pliské si ni konpar sa avèk sète bann ti kolon. Ladan l’avé in préfé-mi koné pa son nom mé i fé arien pars insésaman sou pé i sava shanjé sa - l’avé in zénéral la zandarmri, l’avé ankor dé komisèr d’polis gradé, in diréktèr l’aéropor Gillot épi in diréktèr l’avyasion sivil. Pa inn dan la bann lé né dann 974 sak i vé dir pèrsone lé profète dann son péi, sansa ankor si ni vé lo tan bann koloni la pankor fini.

Mi pé dir kant mèm avan lo konférans an késtyon, moin la vi in sobatkoz plizyèr pèrsone – ni pé batiz azot ékspèr, mé la poin inn ladan non pli lé né dann 974. Mé si ou téi ékout azot zot sèl léspèrtiz i rézime a sesi : zot i koné pa arien dsi lo késtyonzot zot té apré sobatkozé. Moin sa i zène pa moin ké le moun i koné pa, mé i pé fèr kourt kan i koné pa.

Astèr mi rovien lo létamazor la lite kont lo korona-virus, Zot osi zot té i koné pa arien é zot téi koz, mi pé dir azot zot téi koz é an kantité, mèm si défoi mi pans lo brui zot voi té i fé tonm azot somèye. Mé zami si in moun normal té i antann sa, li noré pi dir sa in bann moun néna in sogré, in lourd sogré, é si zot lé konmsa sé pars zot lé an sèrvis komandé mé sirman pa kontan d’ète la.

E nou ? Moin la pèr I zoué avèk nout vi ladan ! I zoué a pil, I zoué A fas, a i ! A dya ! É pou kèl rézilta. Si moin lé ankor la, nou va anparlé : nou sar randu ékspèr dann tan-la si tèlman nout kor sar fine gingn lo kou.