Mon matante Zélida la ékrir Justin :
Mon shèr nové, mon spès salté,
Mi savé pa zot lété monstré konmsa, zot, bann rouj-de-fon. Akoz mi di sa ? Pars zot i arète pa d’krétik lo pti prézidan Sarkozy, son parti l’UMP, épi méssyé Didier. Moin lé a d’mandé si zot i kroi, vréman, zot lé kapab fèr myé ké bann parti la droite-la, pars solon zot la, zot noré surf déssi la kriz, zot nora fé toute sak zot i vé, é lo moun i vé, dann in ka d’kriz konm sa. Zot i gnor la kriz na poin la frontyèr ; Tank’amoin, mi tyinbo d’dir azot, in péi, sa i jèr pa avèk la kras ! Kozé lé bon, mé la pa avèk la blag i fé in n’afèr d’bon pou lo péi. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Figuir aou, moin té i pans zistoman sak ou la di pou bann droite dir. Moin té i pans sé banna k’i kroi tout la krak ou l’apré di. Pou kosa ? Pars dann tout kozman prézidan la Frans, konm dann tout kozman l’UMP épi dann sète méssyé Didier, moin la touzour trouv la blag, la krak, la mantri. Kan i di A i fé B, é kan i di B i fé A. Dann tout domène, lé konm sa ! Dann tout domène, i sèy fé prann Kréol po d’shanm pou pla kouvèr, savon pou fromaz, makaroni pou la bouji. Mi vé pa dir banna i konpran pa arien. Mi trouv mèm, in ga konm Sarkozy, li koné sak i fo fé pou mète La Rényon, mèm la Frans, dann shomin la klarté, mé li la mète ali dann sèrvis bann profitèr, donk li pé pa fé sak i fo dann l’intéré lo pèp épi lo péi. Zot bann kamarad i fé tout pou sèrv z’intéré bann kapitalis, é arien pou aranz la sityasion bann ti-kolon. Dann l’Évanjil i di, i pé pa ansèrv dé mète : Bon dyé épi larzan ; Nou ni pé dir : i ansèrv pa dé mètr, bann kapitalis épi bann pèp, gro vaza épi ti kolon.

 Justin