Biensir k’i pé pa bingn san mouyé é sar konmsa toultan ké nou nora bézoin dolo pou fé nout toilète. Pétète in zour lo sistèm va shanjé si tèlman l’imanité i mank pa l’imajinasyon mé pou zordi lé shoz lé konmsa… Promyé foi moin la antann in kozman konmsa nana bien lontan. In jenn bononm té apré koz avèk in vyé madam épi li té apré rakont sa i ariv ali : li té i frékant in jenn fiy é oila ké li aprann lo jenn fiy lé an voi d’famiy. L’èr-la lo vyé madam la sort ali lo kozman moin la mark an-o la é an mèm tan la ankouraz ali pou asime la sityasion. Ala in promyé sans mé mi pans nana d’ot i pé aplik dann d’ot ka. In l’égzanp : in moun i tir o flan dann travaye pou profite in pé la vi é toudinkou li la gingn dsi lo doi. Alé ! Mi éstop tèr-la é ni rotrouv pli d’van sipétadyé.