Na désèrtin I pans zot I koné tout z’afèr kisoi pars zot lé in pé azé é donk pou zot lo savoir sé lo privilèz par raport a l’az kisoi la modèsti zot la donn lo shien pou manzé étan pti. Désèrtène foi ou I pé mazine ké zot lé si tèlman vantar-ki touni ké zot I pans an avoir konm I di la syans infizé... Atansyon kant mèm : kan I di aprann I vé pa dir tout la zourné, sète zour sir sète, douz moi dan l’ané ou lé bouré dann liv. Pou kosa ? Pars nana in bon pé fason pou aprann ! Nana sak ou I aprann étan dann vant out momon, nana sak ou I aprann avèk out famiy kan ou lé dan la kaz, aprésa nana l’ékol, na la télé donk zot i oi sé pa lo fasonn aprann k’i mank. Aprésa nana osi out fason pou dizèr la konésans afors ou i réfléshi, ou i tourn lo z’afèr, dann in sans épi dann in n’ot ziskatan ké ou i aksèp in n’afèr konm in vérité apré an avoir ien fé dékanté pou an aoir lo zidé klèr. Alé ! ni artrouv pli loin sipétadyé !