Lé vré, sa l’ariv la-ba dan la Frans é la pa ariv isi. Mé in n’afèr konm sa noré été posib isi osi. Ala in moun, in minis la Répiblik, in minis Bidzé bien okipé a sèr la sintir bann Fransé, a vanj kont la frod fiskal, anfin, konm i di, in minis modèl dann in tan la sians razèr d’pint, sansa la téknik raz san savon la ranplas la sians ékonomik.

Mi pans zot la fine konprann mi parl dsi lo ka Jérôme Cahuzac. Zot i koné, kan l’afèr la komansé, moin, konm in bonpé d’moun, nou té kroi lo boug té inosan. Nou la pans, kan lo boug té i répèt "zié dann zié", ni zordi, ni zamé li l’avé rouv in kont dann in péi étranz, lété vré son n’afèr. Nou la pans, pou in moun alé souf sa dann zorèy prézidan, déklar sa dovan bann dépité, té i falé li té vréman sir sak li té i di. Mank de po, lo boug té in marshann parol, in sharjèr d’lo, in mantèr dann lo roiyome mantèr.

La Frans-la, sa in drol péi. Ou i pé manti, mé san fé trap aou. Ou i pé fé la frod si pèrsone i débisk pa ou. Mi koné désèrtin péi, si ou la manti, out kanar lé noir. Moin sré près dakor avèk banna : mantir, sa la pa in n’afèr pou fèr, é si ou la fé kékshoz lé pa bien, i fo ou i asime. Mon l’idé lé konm sa, sirtou kan ou i okip l’intéré zénéral.

Mi souvien, kan moin lété katéshis, lo prèt té i di inn-dé foi dan l’ané : "Pèrsone i pé pa sèrv dé mèt : Bon Dié épi l’arzan !". Dopi étan pti, moin lé dakor èk sa. Dopi, mon zié la rouvèr dsi la koripsion, l’anprofitaz demoun, la traïzon la parol doné, pou moin, sa sé in prinsip i doi réspékté. Lé bien vré, ou i pé pa sèrv l’intéré zénéral é out port-moné. Na touzour inn i manz dann gamèl l’ot.

Justin