Ninport ékèl plantèr va di :"I plant pa zordi pou rékolt yèr !". Di in n’afèr konm sa sé défons in port ouvèr. In moun i di in n’afèr konmsa la pa kas kat-pat in kanar : sa i vé dir li la pa invant zèf bouyi, sinonsa lo tièd. Pourtan lé vré pou vréman sa. Si ou nana in projé, i fo ou prépar ali lo tan ki fo, mem si i fo in bonpé lo tan. Fé la vitès i ansèrv rien : la vitès nana son tan. Sa in marmay huitan i pé konprann.
Sa pou di kosa ? Sépa si zot la fé antansion, moin oui. La Rénion la pa pli gro k’in kok pistash dan la mèr, sa lé vré. Ala pou nout fèt labolision, nana in bann pèrsonalité : Prémié ministr Séchelles, in ministr gouvèrnman Mozambique épi Myriam Makéba i vien oir anou. Néna ankor d’ot solman ni sar pa mark tout lo bann nom. Lé ga, sa la pa ariv konm sa, tousèl, san forsé akoz nou nana zoli zié. Sa Lariv akoz parti kominis avèk son bann prinsipal dirizan dopi lontan nana bon rolasion avèk bann progrésist nout rézion. Pliské sa, dan nout pti péi, nana dirizan*, nana shantèr**, nana zékrivin, nana in bann mèr*** la pa ménaz zot solidarité. Lé vré bann malfondé, nana galman : nou té i soutien Nelson Mandéla, lo gran dirizan toulmoun i koné, alé oir in sèrtin mèr Sintandré téi loué lapartman lo konsüla rasis lafrik-dï-sïd pou ramas larzan.
Sé nout solidarité i fé zordi tousa bann moun i vien oir anou - pa lo bann ti-kolon konm nou - mé sak i roprézant anou, lo bann ti-kolon. Sa i rann anou fièr ; sa i rann anou kontan.Nou koné sa mem i fo fèr pou sèrv nout z’intéré épi z’intéré bann pèp dan nout rézion. Konm dekoi, mem dann bann rolasion rant nasion, "i plant pa zordi pou rékolt yèr, i plant zordi pou rékolt domin pétèt pli tar".

Justin

*bann dirizan parti kominis. Mi souvien galman in lèt Christophe Payet la ékri Nelson Mandela konm i mésaz pou mèt dann in boutèyépi pou zèt dan la mèr.

** Daniel Waro, Ziskakan... d’ot ankor ***agard solman lo bann nom bann rü kisoi dann Por, Possession, Sinte Sizanne.