Oté

I - Pou an avoir in travay assiré !

Alé Québèk :

Justin / 15 novanm 2007

Bann Kébékoi, konm tou lé z’an, la vni rann anou vizit. Afors zot i vien oir anou, ni pé dir zot la fine tonm zami, épi zamiz avèk La Rénion, épi a oir la kantoté d’moun i vien dann zot rénion, moin lé d’avi bann rénioné i èm azot bien galman.

Akoz sa ? Banna i sort loin la-ba dann Lamérik ; dizon, ni koné pa zot. Zot péi lé plis koni par la nèz, par la fré ké par zot solèy, mèm si zot i doi an avoir in pé kant-mèm. Zot lé kosté sanm Lamérik é sèt-la lé koni, arshi koni, lo Québèk lé moins. Bin alor ! Akoz demoun i vien konmsa dann zot rénion ? Daoir akoz zot sé in péi frankofone, épi nou issi, nou na in gro bout nout rasine lé anfonsé la-ba dann la tèr La Frans. Daoir galman akoz zot i vien oir anou issi, épi zot i di anou nou lé bienvéni shé zot. Pétète ankor zot i vien ofèr anou konm in lavantir, in vir-vir nou k’ni trouv pa.

Tousala lé vré, mé sak i doi kont an promié, koméla, sé k’bann moun i sava la-ba na la shans an avoir in bon formasion, épi in bon travay kan lékol la fini. Sa la poin La Rénion, la poin dan La Frans non pli. Ou koné par avans ou nora - sak ou lé pa sir an avoir issi, sansa dan La Frans - in travay assiré.

( ... la pankor fini)

Justin