Mézami zot i koné kozman-la, sa mi koné sa dopi étan pti-mon papa noré di dopi ké mwin la eu mé konéssans. Mi sityé sa par koté sink-sizan, in bon laz pou dékode kozman bann zadilt épi mète sa an mémoir.

Laz-la wi koné la bonté sinploman par lo kontrèr la méshansté, wi koné ossi l’obligassion, pars sé l’èr finalman ou la poin lo shoi. D’apré zot, demoune lé oblizé d’ète bon ? Mon réponss lé sinp : pèrsone lé pa oblizé d’ète bon. Donk la bonté lé pa in l’obligassion é sak i panss sa sé in loi natirèl, mi diré li vé solman ésploité.

Mi rapèl in zistoir mon famiye téi rakonte dsi mon l’aryèr-granpèr, in moune téi fé bann mèb an rotin. In kamarade la komande ali in shèz, li la fé. Mé kan lo ga téi vé pèye ali, li la di sa lé gratuite. Lo boug la di : « Si légratuite fé dê alor ! ». Mi koné pa la suite mé d’apré mwin, sé in bon lilistrassion noute kozman d’zordi.

Alé ! mi kite azot rofléshi la dsi é ni rotrouv pli d’van, sipétadyé !

Justin