Mi ékoute ali bien é mi di, dann mon kèr, kossa boug-la i sava di konm énormité é oila ké li di késhoz sinp. Li di, i fo pa ansèrv lo mo « marmaye » pars zordi in radio sa lé ékouté partou pa solman dsi lo plan lokal, ni mèm dsi lo plan nassional mé dann lo mond antyé é dir « marmaye » olèrk di « enfant » sa i dévaloriz lo radio pars dir marmaye sa sé in mo i trouv pa dann dikssyonèr é lo bande zoditèr lé riskab d’ète dékourazé dovan in mo konmsa.

An touléka bravo pou sak la di sa, mé noré té méyèr li tourn son lang sète foi dann son boush avan d’kozé pars « marmaille » sof son réspé sa lé dann pti dikssyonèr épi i égzis an dizène zégzanplèr dsi google alor parl d’in mo lé riskab déroute lé zoditèr, éskiz mon pardon mé la pa li pou fé sa.

Aprésa toute son bande kritik, mwin pèrsonèl, mi panss sa i vo son poi an kaka zoizo é noré té préférab li fouye in trou épi li antèr son bande kozman d’dan pars mi oi pa dan kèl landroi li pé mète kékshoz konmsa — Si mi rapèl bien in kozman Molière dann le Misanthrope kan Alceste i di : « franshman oute soné lé bon pou mète dann kabiné »… Antouléka mi panss sa in bonplass pou bande kozman konm sak li la fé dimansh matin-la.

Biensir rozman la pa domande ali son lopinyon dsi la lang kréol la Rényon, pars li narté paré pou débite tou t’in shapite la kouyonade nou la fine antand é pa arienk in foi dan la boush demoune i pran po d’shanm pou pla kouvèr épi makaroni pou la bouzi.

A bon antandèr, salu !

Justin