Mézami, mwin lé sir toute demoune va dir amwin konmsa zot i koné kozman-la. Mwin ossi mi koné sa é dopi in bon boute tan. Dapré mwin sa i vé dir, la pa bézwin pran amwin pou in moin k’arien. Mwin néna mon dignité konm ou néna la vote. Mi doi aou réspé konmwi doi mwin réspé.

Pars mi sipoz dann la yérarshi dé valèr in zanfan Bondyé lé pli inportan k’in kanar sovaz. A bien kalkilé, in kanar sovaz, li ossi sé i kréatir Bondyé-antouléka d’apré sak mi kroi é sa lé vré pou la plipar d’moune sof pou bande demoune i kroi ni foute ni taye.

Alé ! kroi bien mi pran pa pèrsone pou kanar sovaz, ni zot non pli, mi panss. In moune s’tin moune, in kanarsovaz sé in kanar sovaze é mi lèss azot rofléshi la dsi é ni artrouv pli d’van. Sipétadyé !

Justin