Moin lé sir tout demoun va di amoin konmsa zot i koné kozman-la. Moin galman mi koné kozman-la. Mé kosa li vé dir pou vréman ? Sanm pou moin lo moun i di sa, i rokomand pa pran ali pou in moins ké riyin. Pars mi sipoz dann la yérarshi bann valèr in zanfan Bondyé lé pli inportan k’in kanar sovaz… A bien kalkilé, in kanar sovaz, li osi sé i kréatir Bondyé pou tout sak i kroi Bondyé la fé lo mond an in somenn. Zot va dir amoin sa in zimaz é néna arienk bann léspri kourt i kroi in n’afèr konmsa. Fitintan si ou l’avé di sa, téi bril aou konm érétik é mi éspèr zordi na pi d’moun i kroi ankor sa. Solman léspri kouyon épi séktèr li sava li vien. Kan ou i pans li lé pi la, alala k’li lé la. Alé ! Mi kite azot rofléshi la dsi é ni artrouv pli d’van. Sipétadyé !