Mésyé, médam, La sosyété, koz èk moin sé koz èk in kouyon-mé sé o pyé d’lo mir k’i oi lo mason. Nout tout i koné in baba sé in zanfan tann mé sak lé sir sé ké na poin bonpé d’moun i koné kosa i lé in baba sèk pars sak ou téi koné fitintan, koméla ou i koné pi. Baba sèk lété lo nom demoun téi done kisoi in léskélète zanfan, kisoi in fétis lo moun téi mète a sésé pou fé lo sor ansanm. Zot i koné de toutan néna d’moun i zoué avèk lo sor : l’avé sa dan tan é néna ankor sa koméla, é mi pans sa sé in n’afèr nora pi d’fin, par raport la kouyonis demoun na pi d’fin é lapa arienk demoun kouyon, mé demoun instruyé galman mé la tète fèb. Alor si in zour zot i antann néna d’moun i zoué avè baba sèk, méfyé azot kant mèm-méfyé azot, méfyé azot zot prop féblèss. Alé ! Mi kite azot rofléshi la dsi é ni artrouv pli d’van. Sipétadyé !