Mézami, méssyé, Médam, la sosyété, koz èk mwin sé koz èk in kouyon, mé o pyé d’lo mir i oi lo masson.. ;Mwin la fine anparl kozman-la dopi kék zané mi komant bann provèb, é si mi arkoz dé sa zordi sé ké sirman demoun la arvaz amwin dsi lo poinnvizé d’atir d’moun sansa do pa atir d’moun, tout la diférans rant in moun bon l’imèr, bon karaktèr épi in moun limèr é lo karaktèr lé an tète koshon. Souvan défoi mi di déssèrtin si zot i vé atir d’moun, fé marsh demoun avèk zot,i fo bien konprann i atir pa moush avèk vinèg é sa lé marké dann lo programasyon nout sosyété, é mi pé mèm dir lé dann nout prop programm. Avan sort dann out gon agard bien si i fo vréman. si i vo pa lo kou, la pa bézoin fé sa.Néna in zour i apèl domin é si ou lé kontan défoul in kou dsi d’moun kalkil la suite lo program. Alé ! mi kite azot rofléshi la dsi é ni artrouv pli d’van. Sipétadyé.