Mésyé, Médam, La Sosyété, koz èk moin sé koz èk in kouyon-mé sé o pyé d’lo mir k’i oi lo mason. Sanm pou moin kozman moin la mark an-o la, sa in bon konsèye pou nout péi La Rényon é pou nout sosyété rényonèz. Néna si tèmann moun souvan défoi an boi pointi ! Néna si tan tèlmann moun mové zimèr mé pa solman pars défoi i diré zot lé bipolèr. Défoi sa in vré maladi, néna défoi sinploman sé in gro maloki. Si sé in maladi, i vo myé alé oir doktèr, sansa tizanèr, sansa ankor dovinèr. Si sé in gro maloki mi pans fo tash moiyin aranz aou par ou mèm. Pars, a bien kalkilé, sé ou mèm lé pèrdan, sé ou mèm lé maléré é ou i rann lé zot maléré, sak lé dann out l’anvironeman. Alé ! Mi kite azot rofléshi la dsi é ni artrouv pli d’van. Sipétadyé !