Zot tout la antann parl la Kès d’épargn, koman dann in zour li la gingn kouraz pou pèrd 695 milion l’ero, pars in pé la zoué la bours dési bann produi mal fouti. Alor, la komans par bat déor bann moun lavé apiy déssi lo bouton... pa bann ti-kolon, mé prèské ! Bann gran vaza la fé zorèy koshon dann marmit poi !
Mé afors bann politik la gronyé, dé gran diréktèr la poz z’ot démission. Békali, konm diré l’ot, bondié i pini pa galé, é lo prézidan i rouv pa son boush pou la po d’patat... In pé la di, sa i mérit azot. I lès pa son tèt son kaz pou alé travay biro !
Inn la di, li démisione é li vé pa pèrsoi son parachute doré (sa in gro larzan i done d’abitid bann gran patron kan zot i rash z’ot kro). L’ot la démisioné galman...
Tousa-la lé bèl, mé avan k’ni fé ri nout boush, alon pèz déssi la ké pou oir si la tèt i bouz... Ala pou kosa ! Inn la sort la Kès d’épargn pou rant Crédi fonsié konm patron karant-uitèr apré son démision... l’ot la rès dann group la Kès d’épargn, mé dann in ot sosiété i apartien lo mèm bank.
Dizon : zot i pèrd in boulo, mé zot i artrouv in n’ot toutsuit... Donkalor, i rash z’ot kro, mé vitman i mèt in kourone pou ranplasé. Fransh vérité !

Justin