Mésyé, Médam, la Sosyété, koz èk moin sé koz èk in kouyon mé sé o pyé d’lo mir k’i oi lo mason. Kozman-la moin lé sir zot i koné ali, mi pans mèm lé posib nou la fine anparl ansanm. Tout fason, zot i koné i aprann bien kan i répète plizyèr foi é opli i répète oplis i tir ladan bann losonn la vi. Dizon sa sé la baz la pédagozi. An parlann guèp, étan jenn moin la gouté pikir guèp é na poin si tèlman lontan moin la déranz azot dsi in pyé zaté é sa bèstyol-la i yèm pa i déranz azot, é kan zot i yèm pa zot i atak, é kan zot i atak i fo méfyé par raport la doulèr, mèm l’alèrzi. L’èrla nou él dann sans prop, mé pou alé dann sans figiré astèr, ni pé dir, lo saz i mète anou an gard kont léspri avantiryé - i mète anou an gard kont bann danzé, tout kalité danzé pa solman sète guèp mé galman danzé par raport lo moun épi la sosyété. Alé ! Mi kite azot rofléshi la dsi é ni artrouv pli d’van. Sipétadyé !