Kan gouvèrnman la Frans la komans désantralizé dann toute Départman épi dann toute Réjyon, demoun la komans méfyé pars plis pouvoir, sé plis larzan pou dépansé, é gouvèrnman, a-tor, a-rézon, nana in répitasyonn razèr d’pinte. L’èr-la, promyé minis dann tan-la, in sèrtin Raffarin… in moun i koz byin, mé mon fra, in raz-a-sèk, vèy pa ! Donk lo boug la di, gouvèrnman va dédomaz bann Départman, sansa bann Réjyon a l’éro-pré, i lèss ar pa, kansréti, in pti katsou déyèr. Sé dir si toute la bate la min !
In bon prinsip, mèm in prinsip gravé dann galé volkan la konstitisyon (in pé i di gravé dan lo marb). Mé kisoi gravé dann galé volkan, sansa dann lo marb, kan larzan lé kourte, li lé kourte, kan na poin an sifizans, na poin an sifizans. L’èr-la, la komans rédi si la korde, konm di l’kont, poz galé par-si, par-la, lèss in ké larzan par issi, par la-ba... Bann Konsèy zénéral konm bann Konsèy rézyonal la komans trouv lo z’afèr in pé soumak-soumak. In pé la komans réklamé... Zot i souvyin kan la ministrèz l’Outre-mèr la vni la Rényon, banna la réklam ali zot du, èl la réponn an foutan... é taler, pa loin troi san milyon l’ero lé an aryèr ! Mé sak lé vré issi lé vré ossi la-ba dann la Frans pir sik. Nana sète Départman la ménas domann rézon dovan Konsèy konsyitisyonèl. Inn la di, li va mète la dète l’Éta konm rosète dann son bidjé. Gouvèrnman la di va soulang ali, donkalor va mète son bidjé sou titèle.
Ala la guèr i sava pété ! Sé l’èr k’lo nouvo prézidan Réjyon Rényon i ariv la bèk anfariné pou domann dévir bann krédi z’Akor Matignon... Mi koné pa kossa va désidé, mé moin pèrsonèl, si moin té li, mi sava pa ravaz guèpe dann son ni. I vo myé pa.

Justin