Oté

« I répar lo trou dann linz pa lo trou la boush »

In kozman pou la rout

Justin / 30 mé 2020

JPEG - 43.6 ko

Mésyé, Médam, La sosyété koz èk moin sé koz è in kouyon, mé sé o pyé d’lo mir k’i oi lo bon mason. Zordi ni kontinyé nout voiyaz dann l’Afrik an provèrb : nou lé dann Zaïre ankor in kou é avèk plis présizyon dann péi Bayombe. Zordi ankor i parl la boush sirtou kan la pèrsone na pi kontrol dosi. Zot i koné provèrb kréol rényoné i di konmsa : “Anval in mo sé gard in zami ! Larg in mo sé pèrd in zami. ». Provèrb l’afrik i mète anou an gard kont nou mèm, kont nout lang é kont nout boush. Tro kozé, sa lé fasil, mé pou répar déga la parol i fé lé pa fasil. Moin la konète in moun bonpé intélizan, mé si tèlman li té i yèm di bann mo, ké lo moun téi rotourn kont li mèm. Alé ! Ni arète la, épi mi invite azot tash moiyin gard kontrol dsi la parol. Ni artrouv pli d’van. Sipétadyé !