Koméla ankor mé dann tan, mi rapèl l’avé demoune téi koz kaziman pa, mi koné pa si sé pars lété onté d’moune,sansa si l’avé pèr di la kouyonade. Pars in pé i di,i vo myé tak son boush plito ké di bétiz.

Dann tan l’avé in pé l’avé pèr l’otorité é pou protèz azot zot téi koz pa.Sof pétète in zour, alé konète pou kossa, la mète a kozé , a kozé, a kozé konmsi zot rézèrvoir parol lété tro plin é l’èr té arivé pou vide lo rézèrvoir- la.

Koméla, mi diré, sanm pou mwin, demoune i koz in pé tro pars koz dann téléfone lé pli fassil ké koz èk demoune si tèlman déssèrtin radyo i baz arienk dsi téléfone pou fèr zot zémissyon é sa i téléfone, matin o soir sa i téléfone san arété é sa i anplègn si i gingn pa zot tour.

Anfin ni diré kréol la fine détake la lang koméla é néna dé shoz pou dir-bone shoz movèz shoz ?- mé néna dé shoz a dir donk détake la lang sré pi d’aktyalité pou la plipar d’moune sof in minorité néna ankor lo frin dsi la lang..
Alé ! Mi kite azot rofléshir la dsi é ni retrouv pli dvan,sipétadyé.

Justin