Mézami yèr mwin la di azot « i ravaz pa guèpe dann son ni » é zordi mi armète ansanb i fo pa rèst koté in moune i fé sa.

Zot lériskab dire amwin tro d’rokomandassion i tyé la rokomandassion, poitan si mi di sa sé par in léspèryanss dann la famiye… Donk in zour, mon papa étan marmaye, té apré bate karé avèk son méyèr kamarade Rozé kan lo dé konparss la ropère in ni guèpe. Sito di, sito fé Rozé i mète a bonbarde lo ni guèpe kou d’galé. Mon papa koté li.

Toudinkou bande guèpe la lévé épi la fonss dsi… Mon papa é la pike ali dsi in parti la politèsse i di amwin nonm pa sa issi. Mon papa sé d’kouri, sote dann bassin d’lo é sirtou mète a kriyé. Sak i vé dire mon kozman lé vré pou vréman é rèss koté in moune apré shaboul ni guèpe kou d’galé la pa in n’afèr a fère.
Alé ! mi kite azot rofléshi la dsi é ni artrouv pli d’van. Sipétadyé.

Justin