Médam zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami amenn in konba lé bien, mé kan wi va pi ébin lé l’èr pou arété. Pars wi koné pa si ou néna ankor in l’éspoir, é défoi ou la fine pèrde konfyanss pars par l’fète wi koné pi si ou la rézon pou vréman osinonsa si ou na tor.

Dann nout patoi kréol i di touzour : « Tienbo, larg pa ». Sa lé bien, mé tazantan i fo oir si ou néna inn shanss gagné, sansa si ou lé dann bon shomin pou gagn in zour. Romarke anou, la pa pars wi oi pa la fin k’i fo arété.

Mi oi bande shagossien ? Zot i tienbo zot i larg pa é d’apré sak mi oi zot lé pa loin gagné. Parèye lo konba konte l’apartheid bande l’afrik di sid la fini par gagné. Alor avan dir i dépoz lé z’arm é bin i fo bien kalkilé.

Alé ! Mi kite azot rofléshi la dsi é ni rotrouv pli d’van. Sipétadyé.