La pa zordï solman i di pétrol lé shèr : prëmyé kriz lété lané 1973. La pa zordï solman i parl lénèrji ki rënouvèl. La pa zordï konsèy réjional i sobat pou mèt an valèr bann sours lénèrji. Sa lé vré vréman.

Solman, alé lïnivèrsité, kart bien out zyé épï, di si ou oi bann zinstalassion pou lénèrji solèr par égzanp. Moin lé pa sïr ou va oir i bon pë. Poitan, moin la konm antand dir, lïnivèrsité i konsome kouran konm la komine Sin-Filip. Si lé vré nou pë dëmann anou pou kossa lïnïvèrsité, sïrtou bann nouvo batiman i sïfi pa lï, par li-mem, sï la késtionn kouran.

Si ou rant dann bann batiman la klimatizassion i fatig out tété, si tèlman nana partou : akoz pa in bon sistem vantilassion. Akoz pa in lïnivèrsité "à haute qualité environnementale."

Lïnivèrsité-la, sa i dëvré èt in landroi oussa tout sak lé modèrn téi devré groupé.
Alor, akoz la pa fé prèss rien sï la késtionn’ lénèrji, la vantilassion, koléktaj dëlo pou son prop bézoin.
Moin sré kontan i bat atèr sak moin l’apré di sansa ma mazine, lïnivèrsité konm d’ot, i rod arienk sïbvansion. Sré domaj si sa té vré !

Justin