Moin la antann sa an parmi in bann zouèr kart. Zot i koné, kan i zoué kart, i ariv k’in pé i trik lo zé, mé lé zot i avèy sa konm lé dsi l’fé si tèlman ké lo trikèr lé riskab fé trap ali. Dan la vi osi, an déor d’kart lé konmsa : nana désèrtin I sèy fé lo malin, mé la malis lé né avan zot, la plipar d’tan, é zot I fé trap azot kisoi par zinpo, kisoi par la loi, kisoi par demoun zot i frékant. Moin pèrsonèlman, mi pans lé pli préférab aplik la loi ké pa apliké… Dann nout sosyété nana in kours rant zandarm épi volèr, é koméla zandarm nana bann moiyin téknik é l’èr ou i kroi ou I pé pass par maye-konm I di pou poisson-ou I fé trap aou. Kréol I di : “toulmoun I fé sa !” Oui, mé kan I souk, I souk pa toulmoun, I souk aou. Lé inzis mé lé konmsa ! Alé ! ni artrouv pli d’van sipétadyé !