Mésyé, Médam, La sosyété, koz èk moin sé koz èk in kouyon mé sé o pyé d’lo mir k’I oi lo bon mason. Ala in kozman mi pans zot konm moin nI koné sa dopi lontan. Mi pans pa sé in provèrb mé an touléka sé in léksprésyon tou-fé k’i amontr tazantan lo karaktèr désèrtin moun. Légzanp : néna d’moun i di « la vanzans sé in pla i manz fré ! ». Sa i vé dir, avan tir vanzans ou i kalkil bien. Ou i fé pa in latak disproporsyoné ! Ou na poin in réaksyon ou i pé z’ète pèrdan. Toulmoun lé pa konmsa ! In pé i réazi kar d’tour san rode lo konsékans, san kalkil si sé in bon réaksyon sansa in mové. Mi rapèl in zour néna in madam l’avé antann i pé, done kou d’pyé, kou d’poin, kou d’tète an mèm tan, él la fé-épi patatras èl la tonm atèr dann shomin dovan son l’ènmi la rèss san bouzé a domandé kosa l’arivé. Son fèrblan la roul atèr dann in gran tapaz. Alé ! Mi kite azot rofléshi la dsi é ni artrouv pli d’van. Sipétadyé.