Tout la sominn la, travay la rouvèr pou mwin, èk in dalon nou la rofé inn ti kaz an brikolaz byin sir vik lo lokatèr la baré, nou la profité pou rotap in pé lo dovantir, lo dodan lo twa, tousa. Lo lokatèr la baré an bon konsantman, donkalor ti-lanp, ti-lanp èk mon dalon ni avans dann travay, kan ni antan in boug i kri. Na pwin personn ? Na pwin personn ? Ni sort pou war. Bonzour, isi i abit mésié intèl parské si sé isi nou la gingn lord pou koup dolo, lo boug la pa péyé.

Koman i pé koup dolo in moun konm sa ? Koman in moun i pé viv san lo ? Kisa é pé pran la désizion koup dolo ? Kisa i kontrol tousala ? Mi konpran pa, minm si lo boug la pa péyé, trouv in laranjman, kansréti inn ti filé d’lo li dwa awar son kaz. Donkalor mi diskit in pé èk lo koupèr d’lo, mi di a li konm sa, li pé pa koup dolo san prévni, li na pwin lo dwa. Li na toupé, li di a mwin, sort a li in lwa i anpèsh koup dolo.

Dann mon léspri a mwin i pé pa fé ninport dé koué èk dolo, dolo lé vital konm i di, kisa i nyabou viv san lo. Tout domoun i dwa an awar drwa san trakasri. Sanm pou mwin i fo ni rovwa tout lo sistinm dolo, rovwar lo pri. Daborinn kisa i mèt lo pri ? Touléka mèt in pri ou tout domoun i vyinbou péyé, mé i fo ké dolo i dovyin in byin komin é ké tout domoun néna dwa.E pi bann gramoun lontan la touzour di a nou « i fo zamé rofiz domoun in pint dolo »