Mi vé pa fé in gran dissèrtassyon la dsi. Mi vé solman di azot dë l’okazyon mwin la antann kozman-la.

– Promyé lokazyon, sé kan l’inivèrsité la déside amontr kréol. Pars avan téi amontr pa… Shinoi pèrsone la pa roproshé ! Parèye pou malgash épi d’ote lang ! Mé kréol déssèrtin té i oi pa son l’itilité : pou sak i koze pa kréol pars la pa sa va amenn kékshoz anpliss pou zot, é pou sak i koné i arvien amontr zako grinp dsi pyéd’boi - donk in sinp l’initilité…

– Na pwin lontan mwin la antann kozman-la in dézyèm foi kan inn-dé shèf intèrnasyonal la vni pou fé la kuizine kréol dann télé é pou amontr anou koman i fé. L’èrla in moune mi koné la di, par raporte banna, kozman mwin la mark an-o la. Mwin la panss lété pa si fo k’sa., lété même in pé vré.

Romarke lo mèm moune noré pi dir dé foi lo même zafère késtyonn ète bien kréol mé pa pliss k’i anfo. A ! ète rényoné sansa pa z’ète rényoné, sa in késtyon sa ! Sé sa la késtyon !

Alé ! Mi kite azot réfléshi la dsi é ni artrouv pli d’van sipétadyé.

NB Zako sé lo sinz ; Mi di sa pou sak i kroi ankor Zako sé in péroké.