Moin la fé in rèv* : tout zafèr i bèss sink pou san. Konm si moin lété révéyé, lo fra ! Pou fète lo fitir mariaz lo prézidan la répiblik, konm i gingn pa invite tout demoun dann in mèm landroi, va bèss tout bann marshandiz. Do lé, li ! lésans, li ! téléfone li ! linz la mark, li ! Bon-bon manzé, li ! étsétéra, étsétéra, la ké lo ra...

Kan la di sa, moin la antann konm in gran dézord dann park kanar. Bann komèrsan - bann gro sirtou - té apré souplégné, té apré di : « Vot mazèsté, vi rod ni mète la klé si la port, Vi koné vou, la-ba, dann vot gran palé, kossa k’i éspass vréman déssi lo térin ? » Gouvèrnman la dress dovan lantouraz pintad, la di : « Nou la di, nou va fé ! » Sak lé pa kontan, li pran konstan ! In poin sé tou...

Alors lo bann moun la domann si i diskit pa in pé, si i fo pa pran in pé lo tan avann désidé, si lo lobsèrvatoir bann pri na poin son mo pou dir. Gouvèrnman la réponn : « I tap avan, i diskit apré ! »... A bon ! Konm sa i fé don ? Antansion ! Issi nou na in patoi i di konm de koi : « Afors alé a lo, kalbas I pète ! ». Ni artrouv san tardé !

Justin

*Martin Luther King : « I’ve a dream »