Oté

I tap dir mé zami ! Afèr ? Pou fé pénitans dsi l’do lé zot ?

Justin / 26 séptanm 2020

JPEG - 43.6 ko

In pé listoir pou komansé :

Si moin téi doi parl azot louis lo katorzyèm mi diré solman inn - dë zafèr-an loukan listoir par lo pti bout o long vi. Inn, li la aboli lo l’édi d’Nantes pou ashèv fou dézord dann roiyome, é li la ankouraz In sèrtin Kolber pou fé lo promyé kod noir-1685- pou moin in gran krime kont l’imanité… Konm tout bann roi li l’amenn inn vi an batonn shèz épi momandoné li la maryé avèk madam de Maintenon é dann Paris demoun téi di sé pou fé pénitans dsi l’do bann fransé-donk dsi l’do s’lé zot.

Kosa sa i vé dir ? sinploman kan ou lé fotif tout in parti d’out vi é ké ou i ariv l’az la mor i komans fé kass kou déyèr out do, ou i vé ratrap aou-i apèl sa rashète out vi - konm ou sé lo roi é ké par définisyon ou néna rézon ébin ou i fé soufèr lé zot épi ou i grinn shaplé, ou i fé la pénitans, ou i di gro grin-pti grin-malingrin kolingrin konm nou té i di pou farsé étan pti, étan marmaye dann la kour lékol.

Pou kosa mi di sa zordi ? Pars na pi lo roi dan La frans mé néna bann désandan, bann prézidan la sinkyèm répiblik é banna néna in gro problèm avèk in pti virus. konm la démokrasi sé lo kadé zot sousi, épi ké zot lé pa kapab asir bann misyon l’éta i doi asiré, oila ké zot i vé fé pèye bann fransé é sirtou dann landroi demoun lé fronté konm Paris sansa Marsèye. Pa pars la pa ékout azot konm ki fo, mé pars la bien ékout azot é na poin lo rézilta atandi an o lyé.

A ! Mézami, pou moins ké sa néna in roi la pèrd son parti sipèryèr. Antansyon mi di pa i fo koup son kabesh mé fitintan lo pèp fransé téi rézonne konmsa. In provèrb pou fini : afors alé a lo, kalbass i kass. Ni artrouv pli d’van.

Nb Moin la fine déza ékri moin néna konm lidé an o lyé i vé fé pèye lo pèp rényoné son soumisyon pars in mète lékol, kan na poin lo rézilta k’i fo, li pini lo zélèv mèm si sète-la la aplik son métode pou aprann lékol. Mi pans nou va an parl désa pli d’van.