Antanssyon, sa i fé in bon boute tan bande kréol i tradui an kréol bande liv ékri an franssé osinonsa dann d’ote lang. Par l’fète zot i koné néna bonpé lang kréol dsu la tèr é lé pa itil ékri, mé mi ékri kant mèm, shak pèp néna son lang kréol, é shak lang kréol lé pa parèye ké lé zot. In sèl poin komin, shak pèp kréol la fabrik son prop lang : morissien la fé kréol morissien, rényoné la fé kréol rényoné, martiniké la é kréol martiniké, guadloupéin la fé kréol guadloupéin… Mi sava pa di toute mé mi panss mwin la fé konprande amwin konm k’i fo.

Ziska zordi bande tradiktèr, la plipar d’tan ékrivèr galman, la travaye shakinn pour soi, suivan la domande é kan lokazyon la prézanté. Dé foi té bande déssiné, défoi bande fonnkèr, défoi zistoir, défoi roman défoi nouvèl, défoi bande zékrivin kréol la tradui an kréol sak zot l’avé ékri dann la lang franssé.

Sak i ariv zordi lé intéréssan pars pou mwin sé promyé foi k’i organiz la tradikssyon lo liv Aimé Césaire dann plizyèr kréol. Lo prinssip lo konkour lé sinp : sak i konkour i tradui dë-troi paragraf é aprésa in juri i done lo pri - aprésa solman zot va tradui lo liv an antyé é zot nora sète, uite moi pou fé lo travaye. An parmi sak lété shoizi-figuir azot banna lété 22 kant mèm néna rényoné, martiniké, haïssien, guadloupéin épi d’ote ankor.

Donk i tarde pa tro pou nou lir « Rotour dann péi d’néssans » dann noute kréol anou, shakinn dan la syène, dann plizyèr kréol si nou lé kapab, épi byinsir dann franssé pou sak i yème lir fonnkèr an franssé. In sakré nouvoté, konm zot i pé rande azot konte par zot mèm.

In romark : néna troi rényoné banna la pré-sélékssyoné Lolita Manga épi Bernard Grondin, épi Emmanuelle Guezzelo.

Noute zoinal Témoignages i félissite toute gagnan épi i souète azot bon travaye an éspèran lir azot san tro tardé.

Justin