Mwin pèrsonèlman, dopi in bon koupe de tan, mwin l’arète avèk bande produi alimantèr mi trouv bizar é mwin lé a d’mandé koman mon kor i réaji avèk sa. Lé pa étonan ké mi fini pa poze amwin késtyon dsi sak i apèl lo panyé d’la ménazèr. Mi rapèl néna lontan, mon gran-mèr Berthe téi di, èl i shèrch in n’afèr pou manzé mé k’i réponde a troi kondission : i fo li lé bon pou la boush, i fo ossi li lé bon pou la santé, troizyèmman li lé bon pou lo porte-moné mé konm èl téi trouv pa touzour, lété pa rar oir aèl apré manz in ranpang dori avèk in pé dsik, sansa in morso mang vèr avèk piman-déssélé.

Konm mon gran-mèr la fine alé l’ote koté la vi, mi koné pa koman zordi èl noré fé pou son ropa. Lé sir li noré té –konm i di- frigal mé mi koné pa si son manzé nora vréman nouri aèl mé si mon gran-mèr l’avé désside manz bande nouritir sipèrmarché, mi panss pa sa noré fé viv aèl lontan. Astèr oila in n’afèr mi panss : kan i sorte in médikaman i fo dé zané é dé zané pou tèsté. Lé normal pars i fo kant mèm vérifyé si lo médikaman i fé pa tonbe aou pli malade, sansa i ansèrv pa arien ditou. Astèr si in lizine i invante in pla préparé pou kossa i fé pa tèste sa an parmi l’moune lo tan k’i fo, pars lé pa sir lo manzé invanté lé pa pli mové pou la santé.

Si ni pran manzé kréol ni koné dopi dé zané é dé zané néna lo mèm konpozission, lo mèm dogré d’kuisson, é sak la pa tyé mon gro-pèr, épi mon gro-mèr, ni mon granpèr ni mon gran-mèr, ni mwin étan pti mwin lé sirésèrtin li sava pa tyé amwin. Mé késhoz in ga i rèst dann péi lo dyab bouyi, i invante é i fabrike, zot i panss mi sava manz sa konmsa san panssé li sava fèr amwin d’tor. Alor mi yèmré k’i vérifyé si la nouritir kui dan l’izine lé pa danzéré é sa sé in prékossion k’i dovré prande dann touléka.

A bon antandèr, salu.