Éya ! Néna d’zafèr dann so péi i apèl la Frans ! Kant in koté i mète de boi avèk bann ti kolon i gingn RMI sansa in pti sédik, i fé pa in kont avèk d’ot moun i gonf z’ot pla plis k’i an fo. Sé konm k’i diré la Frans, sé in péi de droi, mé lo droi la pa lo mèm pou toulmoun.

Na in boug i apèl Gaudron, li lé dann bon parti vik li lé lo mèr in vil la-ba dan la Frans, épi li lé dépité UMP : bononm-la i gingn, koméla ankor, 1500 éro pou son sédic, 4000 éro akoz li lé mèr, épi 7000 éro akoz li lé dépité. Li na poin lo droi gingn larzan shomaz an mèm tan k’son gro moné dépité. Soman, li la gingné, mèm si konm i di, li la ékrir pou signalé : li noré pi ranvoy lo larzan, mé li la pa fé. Li la mazine pétète ranbours lo tro-pèrsi pti-lanp, pti-lanp, konm ninport aki, solman li lé pa ninport aki, li lé dépité : la pa normal li fé sa ! Sirtou si ou di ou sé lo shanpion patanté pou lit kont bann abizèr dsi larzan piblik !

Astèr, tir son sédik, li va gingn an mèm tan 7000 éro, épi 4000 éro. Sérié, zot i pans li va travay pou la valèr ? 11000 éro, sa i tir pa sou rosh sa ! Sé lo droi, mé lo droi la pa zis, donk i fo sanz sa. Mé pèrsone i fé pa : i tié pa poul i ponn zèf an or !

Justin