Médam zé Méssyé, la sosyété, koz èk mwin sé koz avèk in kouyon mé sé o pyé d’lo mir k’i oi lo masson. Mézami, mwin t’apré rogard diksyonèr Alain Armand an diagonal kan toudinkou mon latansyon té atiré par kozman-la. Mi sipoz mwin la fine anparl de sa, mé konm in provèrb lé fé pou répète plizyèr foi pou pa tonm dan l’oubli. Alor, zordi mi roparl azot de sa, pou nou rofléshi in pé dsi pars a bien kalkillé, si mi tronp pa Moïse kan li l’amenn son bann dann la tèr sint l’arète momandoné é konm li l’avé poinn lo, lo ségnèr la di ali tap in kou dbaton d’si in rosh - li la mèm tap in kou épi dë kou… In mank konfyans. An touléka dolo la sort an fantézi dann rosh-la é tout la troup la gingn dolo an fantézi pou ranpli zot gourd épi pou fé zot zablisyon. Alor mézami, nout kozman lé pa vré osinonsa sé in ka d’mirak alor ni pé di : san mirak i tir pa d’lo dann rosh. Mézami, mi arète tèrla, mé pétète nou va arvi pou sa é an atandan, mi kite azot rofléshi la dsi é ni artrouv. Sipétadyé.