Kosa I vé dir nout kozman zordi ? Mi pans sa i vé dir, kan na poin kékshoz kékpar, la pa bézoin alé rodé vi ké ou i trouv ar par. Kosa par ébzanp ? Kan d’moun la poin larzan, ou I gingn ar pa tir arien avèk li. Par ébzanp ankor ? Kan in moun na poin l’amour dann kèr la pa bézoin alé rod l’amour avèk li. Mé a bien rogardé, dann l’istoir la bib, l’ariv in zour in sèrtin Moïz la nyabou tir d’lo dann rosh. Kansa sa l’arivé ? L’ariv dann lo gran voiyaz bann z’ébré dopi l’ézip ziska sak I apèl la”tèr sint”. Mèm k’I di ké Moïz olèrk donn in kou d’baton solman dsi lo rosh la donn dé é dollo l’ariv an kantité dann dézèr. Mé Moïz l’aport la prèv ké son kroiyans dann la parol Bondyé lété pa si for késa. Konm pinisyon i di li lé mor avan la rantré dann tèr sint. Alors, na d’lo dann rosh na poin ? An zénéral na poin mé i pé arivé ké lo kontrèr lé vré osi, sans prop konm sans figiré. Alé, mi lès azot kas z ‘ot koko la dsi é ni artrouv pli d’van sipétadyé.