Mi pans sa i doi z’ète in provèrb l’Afrik sa. Touléka, provèrb-la i sort dann in péi i ansèrv la po kabri... Kansréti pou fé in tanbour. Donk sa i vé dir dan tout shoz ou i tir arienk sak ou i pé tiré é pa plis ké sa. I di pal o pli zoli fiy dsi la tèr i pé done arienk sak èl nana ? Sa in provèrb bien vré : i di aou la pa bézoin rod l’inposib, rod lo posib lé déza bien. Kontant aou sak ou nana san alé rod sak in n’ot nana mé ou, ou la poin. Final de kont in pé nana lo zyé pli gro ké lo vant é sa i fé pa prospèr aou. Mi koné pa kosa zot i anpans mé moin, in kozmn konmsa, i bote amoin toulbon. Alé ! Ni rotrouv pli d’van.