Mi koné pa si na dmoun dann zot famy i travay dann batiman. Moin oui, donkalor, mi pé dir azot lo ranguène i arvien shak foi k’na in rankont famy : na pi an sifizans travayèr batiman. Kissa l’otèr ? Solon mon bann famy, l’otèr sé bann gran shantié : rout tamarin li, prizon Domenjod li, baskilman d’lo. Mi antan mèm sé par sa nana plizanplis travail o noir.

Pou mon par, mi di épi mi ardi, i fo aprann kréol travay, donkalor, i fo la formassion. Ou k’i lé bann kontra an alternans an kantité, bann kontra l’aprantissaz an gaspiy, bann nouvo santr avèk in bonpé stazièr ? Par la-mèm, i form bann travayèr. Mi oi pa si i fé in lo zéfor ki fo. Moin na doutans !

Pourtan, la bézoin bann nouvo travayèr an kantité épi an kalité. Lé vré, nana in bon pé métié kalifié, i fo an avoir bone tèt pou aprann sa ! Mé nana in bon pé jènn lé an kapasité.

Alor, i fo mète ansanm pou ardone léspoir bann marmay la kour. Sirtou, kont pa déssi la “génération spontanée”. I fo pa kroir sa va shap dépi lo sièl. Lé bien vré : « i tir pa sosis kui dann vant koshon ! ».

Justin