Mézami la pa promyèr foi mi anparl azot kozman-la. Lé pa pars mi yèm ali — an vérité mi yèm pa li — mé plito pars mi trouv li lé itil dann toute zaktivité d’la vi. Li lé itil dann lédikassyon zanfan, li lé itil dann travaye, itil dann la politik, itil in pé dann toute sorte shoz si wi pran son kontropyé.

Avèk vinèg, an prinssip wi fé sov bann moush. Pétète pa toultan, mé la plipar d’tan. Antouléka sé sak i fé la kaz kan la sézon sho i ariv é kan moush i pran azot in mové lidé poz dsi manzé. Avèk domyèl sé lo kontrèr : wi atir vréman lo moush. Aou d’pyèz azot si sé sak wi vé.

Aster dan la vi ni pé dir lé pli fassil gingn in n’afèr an doussèr plito k’an britalité. Si ni félissite in marmaye pou son déssin, aprésa sirésèrtin li va fé in léfor pou bien déssiné. Si wi krétik son déssin, sirésèrtin ou va dégoute ali pou déssiné.

Alé ! Mi kite azot rofléshir la dsi é ni rotrouv pli dvan, sipétadyé.

Justin