Lycée Leconte de Lisle, sa in gran lycée Sinn-ni. Té gran mé téi komans in pé fatigué. Alors la Réjion la désid i fo mète ali an nèv. Oté baba ! La kout shèr sa, épi la mète lo tan pou fé. Mé zordi, sa in lycée vayan : bien modèrn, bien kalkilé pou d’moun travay, adapté pou bann moun andikapé... Tan mié, si sa in bon n’afèr pou bien mète la zénèss an l’èr !

Sa lé tèlman bien, lo rézilta lé si tèlman bèl, sétaki i rode ral la kouvèrtir son koté. Sétaki ? Non, na rienk la préféktir la kalkil fé in kou, tash moiyin fé kroir demoun sé l’État la fé sa, é pa La Réjion. Donk lo jour pou fé la fète akoz lo travay la fini, èl la anvoy in nouvèl pou mark dann zournal, pou dir sé lo préfé k’i sava fé le linogurassion .

Prézidan la Réjion la di, si lé konmsa, li vien pa épi li la pa vni... Bien sir bann zournal la droit, épi déssèrtin radio, la di i fo pa lo Prézidan La Réjion i fé la movèz tèt akoz la préféktir la tronpé... Tronpé ? Kissa la anvoy ali fé in kominiké, pou in n’afèr la pa li la déside fé ? Akoz li la pa atann ète invité konm lé z’ot. Li la fine oubli la rézionalizasion don ? Li sort par la port épi li rod rant par la fénète don ?

Bann kritikèr i dovré fé travay in pé z’ot tète : zot i dovré konprann in n’afèr konmsa ! La pa dir oui ! Akoz i vé koup devan konmsa ? Akoz i réspèk pa travay lé z’ot i fé ? Akoz i sèy fé kroir ou la fé in n’afèr ou la pa fé ? Konm i di dann fotbal, i vèy pa la kok konm sa.

NB - vèy la kok sé pa forsé épi atann solman lo bi lé fé pou fé rant balon dann filé ! Dabitid, sé bann paréssé k’i fésa !