Nana in késtyon, i pass é i arpass dann mon tèt san arété. É, mi mazine, moin lé pa tousèl dann in ka konmsa ! Mi mazine nana in bon pé kréol La Rénion l’apré poz azot bann késtyon konm sa... Mon késtyon i port déssi sak mi trouv lé bon pou nout péi, pou rolèv ali in pé, pou donn demoun lanvi rann ali in vizite, pou donn bann rényoné lanvi konèt kossa i fé issi, pou kossa é koman i fé...

Zot i pans in moun va sort dann son vil, dann son kartié, dann son péi pou rann anou in vizite, si tout lé gri, lé sal, lé vilin, lé an dégréné... Nou memm, d’apré zot, nou valé bate karé dann nout péi si na poin arien pou oir, arien pou rogardé, arien pou amontr nout zanfan, nout famiy épi in zami...? Mazine in pé zot l’apré di : alon vizit in pé tèl androi, la poin arien pou oir, tout szafèr lé vilin, lé sal, i pi mové. Pou moij ou v’alé ou tousèl ! Sa lé sir.

Mi pans nou lé konm sa épi la pa nou tousèl. Sak lé plézab i atir anou, sak lé dir pou fèr épi i niabou fèr, ni èm alé oir : in gayar légliz, in shapèl malbar bien dékoré, in zoli pon k’i flèsh dann vid, in moniman, in linivèrsité, in lisé bien modèrn, mèm in kaz demoun bien proporsiyoné. Sa i atir anou, koman-koman i fo ni pass dovan, épi i fo ni amenn demoun oir. Sa i rann anou fièr pou nout péi é pou l’moun la fé tousala.

Konm di le patoi : i vo mié fèr anvi k’ pitié !

Justin