Médam zé Mésyé, la sosyété, koz èk moin sé koz èk in kouyon, mé sé o pyé d’lo mir k’i oi lo vré mason. Mézami, mi pans zot i koné kozman-la : dabor pars bann léktèr Témoignages i koné in bonpé d’zafèr, épi pars provèrb, moin la mark an-o la, lé bien konu. Mé si mi di sa, sé pars néna in n’afèr mi yèm pa sé fé pityé, pars sa sé in kiltir familyal. In zistoir pétète si zot i vé : dann tan bann prète téi modi bann kominis, épi mèm bann zanfan bann kominis, moin néna in frèr lo prèt la mète déor lo ban katéshis é son kèr té gro. Mon gran-mèr Berthe lété parti rode ali épi la di : « Plèr pa mon n’anfan, zènmi out papa sar tro kontan. »I paré mon frèr la marsh droit konm in moun fyèr. I vo myé fèr anvi ké pityé zot i pans pa ? Zour-la moin lé sir mon frèr la fé anvi é pa pityé. Mi kite azot rofléhi la dsi éni artrouv pli d’van. Sipétadyé.