Médame, zé Méssyé, la Sosyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami, kozman-la sa in kozman bannzil Komor. Mi koné pa si zot i partaz la morale kozman-la. Pou kossa mi di sa, pars dabor ni koné la pa toute vérité lé bone a dir é souvan défoi i vo myé byèze in pé avèk la vérité. Pou mon par, la pa ariv amwin arienk in foi rogrète in vérité mwin la di. Dabor, kissa i prouv sé la vérité, i fo ou lé sir san pour san. Dizon ou lé sir, kalkil alor si ou i sava di in bon n’afèr sansa in mové zafèr. Kalkil lo rézilta sak wi sar di : avan di in n’afèr tourn sète foi out lang dann out boush é kan ou la fine tourné lé pa sir i fo wi di. Antouléka, shakinn i fé konm li désside fé, li di konm li désside di. Mwin mi diré sé solon é la pa pou sa mwin néna la solission. Alé ! Mi konte dsi zot pou rofléshi la dsi, é ni artrouv pli d’van. Sipétadyé.