Partou zot i parl réshaufman klimatik épi son bande konsékanss : néna la foré i bril in pé partou, néna la séshrèss sansa lo tro d’lo, néna la mèr i shof, néna glassyé k’i fonde. An touléka sa i boulvèrs a vi d’moune é é bien danzéré…

Mé mi poz amwin késtyon kant mèm :
Néna trantan par-la i anparl réshofman-dérègloman klima mondyal. Paul Vergès kan li lété sénatèr i la fé vote in loi — a l’inanimité siouplé — pou mète l’ONERC an plass. Shak ané li téi fé in rapor. Shake ané gouvèrnman l’avé son légzanplèr. Konéssan nout kamarade, mi pé dir azot li la pa solman fé in rapor dsu léta lo réshofman-dérègloman, li la propoz ossi bande solission… Bande solissyon pou prévnir bande dézagréman ni koné koméla mé aparaman, in pé partou dan La franss la pa fé arien pou prévnir.

Astèr ni koné dopi in bon koupe de tan in bonpé d’moune, in bon pé mouvman déssèrtin parti la pa arète tir lo signal d’alarme… mé aparaman si i ékoute bande viktime la séshrèss, sansa l’inondassyon, in pé partou la pa fé an tan vouli la prévanssyon k’i fo. Alor zordi ké nou lé anplin d’dan lo shanjman klimatik bokou i domande azoyt kossa i fo fé astèr.

Prévnir lé tar. Guérir, pa sir si lé ankor tan !

Antouléka, i fo ésséyé — A bon ékoutèr, salu !

Justin