« I vo myé z’ète toussèl ké mal akonpagné »

Mézami, médame zé Méssyé, la sossyété,

Di pa mwin zot i koné pa kozman-la, pars an prinssip sa in provèrb toulmoune i koné, jenn konm vyé, même demoune izazé i koné sa.

Mé pou lo ka zot i konétré pa, mi konsèye azot bien mark sa dann zot karné pèrsso. Pou kossa ? pars sa lé bien itil konm règ do vi dan la sossyété. I vo myé zot i mète sa bien dsi zot diks dir, avan zot vyé famiye i fé romark azot sa. Pars zot i koné issi La Rényon, dann in lanvironeman, néna touzour in pé i shass pa avèk d’ote, mèm i manzré pa in grinnsèl avèk zot voizin, voizine, konpère, komère pou in zistoire i romonte kaziman dopi lantikité. Souvan dé foi wi antande inn lé fashé avèk l’ote, pou in rézon pèrsone i di pa ou, mé antouléka, alé pa frékante demoune l’ot famiye pars fashé sé fashé é sé pa rakomondé.

Pari pi si ou garsson wi koze avèk inn fiye oute famiye lé fashé avèk son famiye, Ou lé kapabe gingn inn rinssé avan konprande pou kossa. Parèye pou in fiye.

An touléka, mi invite azot bin rofléshi la dsi é ni rotrouv pli d’van. Sipétadyé.